2Cor 8 | NdeIBE | STEP | Bazalwane, sithanda ukuba lazi ngomusa uNkulunkulu awunike amabandla aseMakhedoniya.

2 Corinthians 8

Ukuphana Kuyakhuthazwa

1 Bazalwane, sithanda ukuba lazi ngomusa uNkulunkulu awunike amabandla aseMakhedoniya.

2 Ekulingweni kwawo okunzima kakhulu, lokuthokoza kwawo okukhulu kanye lobuyanga bawo bokucina kugcwele ukuphana okumangalisayo.

3 Ngoba ngiyafakaza ukuthi anikela okunengi njengayengakwanelisa, kanye lokudlula amandla awo. Bona ngokwabo, 4 basincenga ngokuphangisa ukuba babe lethuba lokuhlanganyela kulokhukusebenzela abangcwele.

5 Kabenzanga njengesasikulindele, kodwa bazinikela eNkosini kuqala, muva bazinikela kithi kuvumelana lentando kaNkulunkulu.

6 Ngakho samncenga uThithusi, njengoba wayeseqalisile ngaphambili, ukuba lawo awuqede umsebenzi lo womusa kini.

7 Kodwa njengoba lisenza kuhle ezintweni zonke – ekukholweni, lekukhulumeni, lekwazini, lekuzimiseleni okupheleleyo kanye lakukho ukusithanda kwenu – bonani ukuthi lenza kuhle futhi kulo umusa wokuphana.

8 Angilibekeli mlayo, kodwa ngifuna ukuhlola ubuqotho bothando lwenu ngokuluqathanisa lokuzimisela kwabanye. 9 Ngoba liyawazi umusa weNkosi yethu uJesu Khristu, ukuthi lanxa wayenothile, kodwa waba ngumyanga ngenxa yenu, ukuze kuthi ngobuyanga bakhe lina linothe.

10 Njalo nansi iseluleko sami mayelana lalokho okuhle kakhulu kini kule indaba: Nyakenye laba ngabokuqala kungayisikho ekupheni nje kuphela kodwa lekubeni lesifiso sokwenza njalo. 11 Khathesi-ke uqediseni umsebenzi, ukuze ukutshiseka kokufuna kwenu ukwenza kungalingana lokuwuqeda kwenu, mayelana lalokho elilakho.

12 Ngoba uma isifiso sikhona, isipho siyamukeleka mayelana lalokho umuntu alakho, hatshi mayelana lalokho angelakho.

13 Isifiso sethu akusikuthi abanye bakhululwe lina lilokhu licindezekile, kodwa ukuba kube lokulingana.

14 Ngalesisikhathi ngenala yenu lizabanika abakuswelayo, ukuze kuthi labo ngenala yabo baliphe elikuswelayo. Lapho-ke kuzakuba lokulingana,

15 njengoba kulotshiwe ukuthi: “Lowo owabutha okunengi kabanga lokunengi kakhulu, lalowo owabutha okulutshwana kabanga lokulutshwana kakhulu.”

UThithusi Uthunywa EKhorinte

16 Ngiyambonga uNkulunkulu owabeka enhliziyweni kaThithusi ukukhathazeka kunye engilakho ngani. 17 Ngoba uThithusi kamukelanga isicelo sethu nje kuphela, kodwa uyeza kini ngokutshiseka okukhulu, njalo ngokuzithuma kwakhe. 18 Njalo kanye laye sithuma umzalwane obatshazwa ngamabandla wonke ngenxa yomsebenzi wakhe wokutshumayela ivangeli.

19 Phezu kwalokho, wakhethwa ngamabandla ukuba asiphelekezele sithwele umnikelo esiwuphetheyo ukuze sidumise iNkosi uqobo lokuba sibonakalise ukutshisekela kwethu ukusiza. 20 Sifuna ukuxwaya insolo ngendlela esiphatha ngayo lesisipho sokuphana. 21 Ngoba siyalwisa kakhulu ukuba senze okulungileyo, kungasikho emehlweni eNkosi kuphela kodwa lasemehlweni abantu.

22 Phezu kwalokho, sithuma kanye labo umzalwane wethu ohlezi ebonakalisa kithi ngezindlela ezinengi ukuthi ukhuthele, ikakhulu khathesi ngenxa yethemba lakhe elikhulu kini.

23 UThithusi yena-ke ungohlanganyela lami loyisisebenzi kanye lami phakathi kwenu; abazalwane bethu bona-ke bangabameli bamabandla lodumo kuKhristu. 24 Ngakho-ke, tshengisani abantu laba ubufakazi bothando lwenu kanye lesisusa sokuzigqaja kwethu ngani, ukuze amabandla wonke alubone.